- 761 a -

1452. April 24.

Der Rath von Danzig meldet dem Rath von Liegnitz, dass der danziger Bürger Peter Vmbericht, dessen Schwester von dem liegnitzer Bürger Hans Bunzel ermordet worden ist, seinen Vetter Hans Vmbericht bevollmächtigt hat, den Mörder rechtlich zu verfolgen und bittet für ihn um Rechtsbeistand.

Vor allen vnd itczlichen, die desen brieff zeen adir horen lesen vnd besundern vor euch, ersamen, weisen vnd vorsichtigen mannen . . burgmeistern, ratmannen, richter, scheppen vnd behegtem dinge der statt Legnitcz, vnsern lieben frunden bekennen wir . . burgermeister vnd ratmanne der stat Danczik noch beheglicher, fruntlicher erbietunge vnsir bereiten dienste mit begerunge vnd vermogen allis gutis vnd begeren wissentlich czuseynde, das vor vns in sitczenden rath gekomen seyn die erbern richter vnd scheppen vnser stat czeugende offenbar mit behegtem dinge, wie vor sie gekomen ist Peter Vmbericht vnser stat metediener vnd hat clegelichen vorbracht vnd czu kennen geben, das Katherina seyne eliche swester, die Thomas Kochs euwers mitburgers eliche huwszfrauwe gewest ist, czwischen euwer stat Legnicz vnd Waldaw von eynem ouch euwern mitwoner genubt Hans Bunzel eynem vorsprechen, alse her vnderrichtet ist, bey zeben jaren geleden, jemerlichen dirmordet vnd vom leben czum tode gebracht ist, dorvmbe her nw, noch deme her er nehste swertmog vnd erbname ist, denselben mort vnd totslag noch vszweisunge des rechtis czufordern der nehste ist vnd vmbe hindernisse willen seynes dienstis doch selbist personlich czu euch vff disz czeit nicht komen en mag, so hat her in der besten weise vnd gestalt des rechtis, als her von rechte sulde vnd muchte, vor gehegtem dinge vnsir stat vorbenant vulmechtig gemacht Hans Vmbericht seynen vetter, desen beweiser, den vorgedachten mort vnd totslag noch gange vnd vszweisunge des rechtis kegen den vorbenanten Hans Bunczel czufordernde vnd czufulfurende vnd gemeynlich alle ding dobey vnd mete czuthuende vnd czulassende, alse ab her personlich kegenwertig were, ouch andere procuratores vnd mechtigers, eynen adir mer, in denselben sachen gleich im vortan czusetczen vnd czu mechtigen, so gefache is not vnd behuff thun wirt. Dasselbe hat der vorgenante Peter gloubit stete, veste vnd vnuorseret czuhalden in allen czukomenden czeiten, worvmbe euwir ersame vnd vorsichtige weisheid vnd alle erluchte ffursten vnd wurdige herren vnd vnsir guten frunde, die mit desim vnserm brieffe besucht vnd ermanet werden, wir mit begerlicher andacht dienstlichen vnd fruntlichen bitten, das sie dem vorbenanten Hans Vmbericht in forderunge vnd vulfurunge des vorgeschreben rechtis kegen dem vorbenanten Hans Bunczel also viel, alse recht ist, lassen geschen vnd widderfaren. Das velle wir kegen euwir ersame vnd vorsichtige liebe vnd die euweren vnd kegen sie alle in sulchen adir dergleichen adir grossem sachen gerne widder vorschulden vnd vordienen, wo wir sullen vnd mogen. In geczeugnisse der warheid der vorgeschreben sache ist vnser stat Danczig secrett czurucke hiruff gedrucket. Im jare vnsers herren ffierczenhundert vnd im czweivndfumffczigsten jare am montage noch Georgii martiris.

O. d. St. L. No, 412b. Das grüne Siegel ist abgesprungen.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866